អាវុធហត្ថខេត្តព្រះសីហនុ បង្រ្កាបទីតាំងឆបោកតាមប្រព័ន្ធបច្ចេកវិទ្យា (Online Scams) ឃាត់ខ្លួនជនបរទេសចំនួន ៣៥នាក់ និងដកហូតសម្ភារបទល្មើសជាច្រើន

អាវុធហត្ថខេត្តព្រះសីហនុ បង្រ្កាបទីតាំងឆបោកតាមប្រព័ន្ធបច្ចេកវិទ្យា (Online Scams) ឃាត់ខ្លួនជនបរទេសចំនួន ៣៥នាក់ និងដកហូតសម្ភារបទល្មើសជាច្រើន
​ខេត្តព្រះសីហនុ៖ ក្រោមការដឹកនាំ និងចង្អុលបង្ហាញដ៏ខ្ពង់ខ្ពស់ពី ឯកឧត្ដម នាយឧត្ដមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស, ឯកឧត្ដម ម៉ាង ស៊ីណេត អភិបាល នៃគណៈអភិបាលខេត្ដព្រះសីហនុ និងមានការបញ្ជាផ្ទាល់ពី លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ។
​កាលពីវេលាម៉ោង ២៣:៣០នាទីយប់ ថ្ងៃទី២៣ ខែសីហា ឆ្នាំ២០២៦ កម្លាំងជំនាញមន្ទីរស្រាវជ្រាវព័ត៌មានសន្តិសុខ ចំនួន ២០នាក់ ដឹកនាំដោយ លោកវរសេនីយ៍ឯក សុង កុសល មេបញ្ជាការរងកងរាជអាវុធហត្ថខេត្ត ដោយមានការសម្របសម្រួលនីតិវិធីពី លោក ឆាយ សុត្រា ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ បានចុះត្រួតពិនិត្យ និងឆែកឆេរទីតាំងសណ្ឋាគារ “ឈុនអុី” កម្ពស់ ២២ជាន់ ស្ថិតក្នុងភូមិ២ សង្កាត់លេខ៣ ក្រុង-ខេត្តព្រះសីហនុ។
​ជាលទ្ធផល កម្លាំងសមត្ថកិច្ចបានឃាត់ខ្លួនជនបរទេសសរុបចំនួន ៣៥នាក់ (ស្រី ០៤នាក់) ដែលសង្ស័យពាក់ព័ន្ធករណីបទល្មើសឆបោកតាមប្រព័ន្ធបច្ចេកវិទ្យា (Online Scams) រួមមាន៖
​ជនជាតិចិន៖ ៣១នាក់ (ស្រី ០២នាក់)
​ជនជាតិប៉ាគីស្ថាន៖ ០២នាក់ (ស្រី ០២នាក់)
​ជនជាតិចិនតៃវ៉ាន់៖ ០១នាក់ (ប្រុស)
​ជនជាតិឥណ្ឌា៖ ០១នាក់ (ប្រុស)
​វត្ថុតាងដែលដកហូតបានរួមមាន៖
​កំព្យូទ័រយួរដៃ (Laptop)៖ ១៣គ្រឿង
​កំព្យូទ័រលើតុ (All in one)៖ ២៨គ្រឿង
​ទូរសព្ទដៃផ្ទាល់ខ្លួន៖ ៤០គ្រឿង
​ទូរសព្ទពាក់ព័ន្ធសកម្មភាព Scams៖ ៥៥គ្រឿង
​លិខិតឆ្លងដែន៖ ១០ក្បាល
​បច្ចុប្បន្ន ជនសង្ស័យទាំង ៣៥នាក់ រួមជាមួយនឹងវត្ថុតាង ត្រូវបានបញ្ជូនទៅកាន់ការិយាល័យជំនាញ នៃបញ្ជាការដ្ឋានកងរាជអាវុធហត្ថខេត្តព្រះសីហនុ ដើម្បីចាត់ការតាមនីតិវិធីច្បាប់៕
​(ព័ត៌មាន៖ ស្ថាប័នកងរាជអាវុធហត្ថ / រូបភាព៖ ការិយាល័យជំនាញ)