បែកធ្លាយ! សំណង់ខ្នាតយក្សរំលោភយកដីចំណីអូរនៅស្រុកគីរីសាគរ រងការចោទប្រកាន់ថាជាទ្រព្យសម្បត្តិរបស់ប្រធានការិយាល័យភូមិបា
ខេត្តកោះកុង៖ សំណង់ខ្នាតយក្សមួយកន្លែង ដែលកំពុងសាងសង់រំលោភបំពានចាក់ដីចូលក្នុងដីចំណីអូរ នៅចំណុចអូរសម្លៀង ស្ថិតក្នុងភូមិព្រែកស្មាច់ ឃុំកោះស្ដេច ស្រុកគីរីសាគរ ខេត្តកោះកុង កំពុងរងការរិះគន់យ៉ាងក្តៅគគុកពីសំណាក់ប្រជាពលរដ្ឋ និងមន្ត្រីរាជការក្នុងមូលដ្ឋាន ថាជាកម្មសិទ្ធិរបស់លោក អេង ឡេងសួន ប្រធានការិយាល័យភូមិបាលស្រុកគីរីសាគរ និងជាប្រធានក្រុមការងារវាស់វែងដីធ្លី។
យោងតាមការបញ្ជាក់ពី លោក ទួន ឪទី អភិបាលរងស្រុកគីរីសាគរ ទទួលបន្ទុកការងារដីធ្លី បានប្រាប់អ្នកសារព័ត៌មានតាមទូរស័ព្ទថា សំណង់នេះពិតជាជារបស់លោក សួន ប្រធានភូមិបាលប្រាកដមែន ដោយលោកបានធ្វើចំនួន ៩បន្ទប់ ក្នុងបំណងចែកជូនក្រុមការងារដែលធ្វើការជាមួយគ្នាម្នាក់មួយល្វែង។
ការស៊ើបអង្កេត និងប្រតិកម្មពីភាគីពាក់ព័ន្ធ
លោក អេង ឡេងសួន (ប្រធានភូមិបាលស្រុក)៖ នៅពេលអ្នកសារព័ត៌មានទំនាក់ទំនងសុំការបកស្រាយ លោកបានឆ្លើយតបមិនសូវច្បាស់លាស់ និងបានបញ្ជាក់នៅចុងក្រោយថា «កំពុងជាប់រវល់»។
លោក រស់ វីរ៉ាវុធ (ប្រធានមន្ទីរដែនដី នគរូបនីយកម្ម និងសំណង់ ខេត្តកោះកុង)៖ បានឆ្លើយតបយ៉ាងទន់ភ្លន់ថា លោកមិនទាន់បានជ្រាបអំពីករណីនេះនៅឡើយទេ និងរង់ចាំធ្វើការសាកសួរ និងពិនិត្យមើលសិន។
លោក សន ស្រិញ (មេឃុំកោះស្ដេច)៖ ក៏ត្រូវបានអ្នកសារព័ត៌មានទំនាក់ទំនងសួរនាំអំពីករណីនេះផងដែរ កាលពីថ្ងៃទី១៧ ខែសីហា ឆ្នាំ២០២៦។
ប្រភពពីមន្ត្រីមូលដ្ឋាន និងប្រជាពលរដ្ឋ
ប្រភពព័ត៌មានពីមន្ត្រីក្នុងស្រុក និងប្រជាពលរដ្ឋ (សុំមិនបញ្ចេញឈ្មោះ) បានទម្លាយថា សំណង់នេះជាទ្រព្យសម្បត្តិរបស់លោក សួន ដោយផ្ទាល់ ប៉ុន្តែមានការដាក់ឈ្មោះអ្នកផ្សេងឈរឈ្មោះជំនួស ដើម្បីបាំងភ្នែកពេលមានក្រុមការងារថ្នាក់ឃុំ ស្រុក ឬខេត្ត ចុះពិនិត្យ។ ប្រភពដដែលបន្តថា គេតែងតែឃើញលោក សួន ចុះមកត្រួតពិនិត្យការសាងសង់នេះជាប្រចាំ។
មន្ត្រីមួយរូបទៀតបានបន្តថា គម្រោងនេះមានទាំងផ្ទះល្វែង និងផ្ទះកម្សាន្ត ដែលគ្រោងចំណាយប្រាក់ប្រមាណ ៧០ម៉ឺនដុល្លារ ដោយសង្ស័យថាជាចំណូលទទួលបានពីសកម្មភាពការងារវាស់វែងដីធ្លីកន្លងមក។
មហាជន និងប្រជាពលរដ្ឋក្នុងមូលដ្ឋាន កំពុងរង់ចាំមើលចំណាត់ការផ្លូវច្បាប់ពីសំណាក់ លោកជំទាវ អភិបាលនៃគណៈអភិបាលខេត្តកោះកុង និងមន្ទីរជំនាញពាក់ព័ន្ធ ក្នុងការចុះទប់ស្កាត់ និងកាយដីដែលចាក់លុបចូលអូរនោះចេញវិញ ដើម្បីធានានូវភាពស្មោះត្រង់ តម្លាភាព និងកុំឱ្យមានការលើកឡើងថា «ពលរដ្ឋក្រីក្រធ្វើមិនបាន រីឯអ្នកមានអំណាចធ្វើអ្វីក៏មិនខុស»។